Chenova - Biquipedia, a enciclopedia libre

Chenova (Zena en ligur, Genova en italiano y oficialment) ye una comuna italiana en a rechión de Liguria, que ye a capital d'a suya rechión y tamién d'a ciudat metropolitana de Chenova. Ye a o canto d'a mar Mediterrania, en o golfo de Chenova.

Tien una superficie de 243 km², una población de 611.683 habitants (en 2008) y una densidat de población de 2.517,21 hab/km². Ye o puerto mas important d'Italia y ye o segundo puerto d'a mar Mediterrania dimpués d'o de Marsiella, en Francia.

A ciudat creixió en o sieglo XX, incorporando muitos municipios amanatos, y hue tien 71 unidaz urbanas, dimpués de que s'han adhibito 25 municipios.

En aragonés medieval s'escribe Genova, Genua, Genoa, con atras variants ortograficas, d'astí os chentilicios Genoveses u Chenueses.

En o "Libro d'as Marabillas d'o Mundo" trobamos Genoa y o chentilicio Genoeses:

Et se dubda assi fuerme(n)t el lue(n)go cami(n)o [/] Si p(re)nden lures m(er)cad(e)rias a lisla de cathay q(u)i es mas c(er)ca / Et si no es pas tan c(er)ca q(ue) no c(on)uie(n)ga met(er) .xj. meses o xij. a yr por mar & por t(ier)ra de jenoa / o de venecia ata cathay Et encora es la t(ier)ra de p(re)stre joh(an) mas luein / muchas jornadas los m(er)cad(e)ros q(u)i van p(ar)dalla passan por p(er)sia & van a vna cibdat q(ue) ha nombre h(er)mopola /

En a "Gran Cronica d'Espanya" trobamos o chentilicio ginoueses:

La armada del rey de castiella sta(n)do guardando la mar et staua(n) hi .l. galeas de ginouesses et de castellanos .x. galeas et de arago(n). et aq(ue)stos era(n) de guerra

Tamién en as actas d'as Corz d'Alcanyiz de 1436:

item, pennas genuesas, cada vestir, cuadro dines

A ciudat de Chenova se troba situata a o canto d'o golfo de Chenova, que fa parte d'a mar Ligur y, a o suyo traviés, d'a mar Mediterrania. Os monts Apenins prencipian chusto a o norte d'a ciudat, que amás ye amanata a la plana d'o río Po.

O suyo termin municipal muga con os termins de Arenzano, Bargagli, Bogliasco, Bosio, Campomorone, Ceranesi, Davagna, Masone, Mele, Mignanego, Montoggio, Sant'Olcese, Sassello, Serra Riccò, Sori y Tiglieto.

Chenova tien una ampla historia. Estió una ciudat d'os ligurs, y os cartachineses la destruyoron en 209 aC. Fue reconstruita dimpués d'a suya incorporación a l'Antiga Roma.

En 932 una flota de piratas musulmana la conquirió y la espulló.^[2]

En a Edat Meya, Chenova estió una "Republica maritima", a Republica de Chenova, construita sobre o comercio maritimo. Dominó as islas de Cerdenya y Corcega, aliata primero con a Republica de Pisa y dimpués en solitario, dimpués de bellas luitas con os pisans. En 1453, a conquiesta de Costantinoble por l'Imperio Otomán estió un golpe cerenyo ta Chenova.

Dica istas calendatas, Chenova estió aliata con Espanya, a qui dió aduya militar, en especial maritima. Estió tamién un important puesto en o camín espanyol, ta portiar tropas d'Espanya ta Flandres por a mar Mediterrania.

En 1815 estió decidito en o Congreso de Viena que s'adhibise a lo Reino d'o Piamonte, feito que significó dimpués que s'adhibise a Italia.

Estió una important base militar d'a Regia Marina italiana en o sieglo XX, especialment mientres a Segunda Guerra Mundial.

En chenova tien a suya seu a Federación Internacional de Basketbol (FIBA).

D'entre todas las instalacions esportivas cal destacar o Estadio Luigi Ferraris, de propiedat municipal a on chugan os principals equipos de fútbol d'a ciudat y selección de rugby d'Italia.

O fútbol ye representau prencipalment por 2 equipes: a Genoa Cricket and Football Club, o club mas antigo en actividat continua d'Italia y por a Union Calcio Sampdoria que ye o mas conoxiu y representatiu d'a ciudat.

Lista d'alcaldes

Lechislatura	Nombre	Partiu politico
1946–1948	Giovanni Tarello	Partito Comunista Italiano
1948–1951	Gelasio Adamoli	Partito Comunista Italiano
1951–1960	Vittorio Pertusio	Democrazia Cristiana
1960–1961	Nicio Giuliani	Comisario extraordinario
1961–1965	Vittorio Pertusio	Democrazia Cristiana
1965–1966	Augusto Pedullà	Democrazia Cristiana
1966–1966	Giuseppe Franzè	Comisario extraordinario
1966–1971	Augusto Pedullà	Democrazia Cristiana
1971–1975	Giancarlo Piombino	Democrazia Cristiana
1975–1985	Fulvio Cerofolini	Partito Socialista Italiano
1985–1990	Cesare Campart	Partito Repubblicano Italiano
1990–1992	Romano Merlo	Partito Socialista Democratico Italiano
1992–1993	Claudio Burlando	Partito Democratico della Sinistra
1993–1993	Alfio Lamanna	Partito Repubblicano Italiano
1993–1993	Vittorio Stelo	Comisario prefecticio
1993–1997	Adriano Sansa	Independient d'ezquierdas
1997–2007	Giuseppe Pericu	Democratici di Sinistra
2007–2012	Marta Vincenzi	Partito Democratico
2012–	Marco Doria	Centro-ezquierda

• 1991: Buenos Aires (Archentina).

• Se veigan as imáchens de Commons sobre Chenova.
• (it) Pachina web oficial municipal de Chenova.