Portaavions - Biquipedia, a enciclopedia libre

Un portaavions^[1] ye una nau de guerra u vaixiello disenyada ta desplegar y recullir avions, actuando como base aeria naval.

Os portaavions permiten a las fuerzas navals tener protección aeria a gran distancia sin amenistar bases aerias terrestres. As armadas modernas emplegan iste tipo de nau, como nau insignia, un papel que d'antis mas preneba o acuirazau. O cambio parte d'a creixent importancia d'a superioritat aeria como parti clau d'a guerra moderna, que prencipió en a Segunda Guerra Mundial.

Os portaavions sin d'escolta se consideran vulnerables a l'ataque d'atros vaixiellos, avions, submarins u misils, y por ixo viachan en grupos de batalla. A diferencia d'atras naus capitals d'o sieglo XX, a unica limitación en o suyo disenyo ha estau o presupuesto.

Os portaavions de disenyo moderno contan con una cubierta plana, a modo de pista de despegue y aterrizache, que ocupa a parti superior de vaixiello y a mayor parti d'a suya eslora. Os avions despegan por a prova y aterrizan por popa.

Os portaavions navegan a velocitat alta y rumbo contra o viento mientres os despegues, ta incrementar a velocitat aparent d'o viento en a cubierta y asinas facilitar a maniobra de despegue d'os avions.

Atros elementos d'a cubierta de vuelo se diferencian en función d'os tipos d'avions emplegaus: convencionals u bien V/STOL y helicopters. En o primer caso (como por eixemplo os grans portaavions d'os Estaus Unius) requieren de catapultas especials que dan un empentón adicional que permite despegar a os avions. D'atra man ta reducir a distancia en os aterrizaches se fa servir un sistema de cables que s'acollan a o gancho de coda que levan os avions. Un sistema diferent ye o emplegau por avions de despegue curto como os Harrier, requiere d'una cubierta de vuelo con un trampolín final (una chicota elevación) y aterrizan autonomament de traza vertical. Os helicopteros aterrizan y despegan verticalment permitindo operar, amás d'os portaavions, en destructors u fragatas con cubierta de vuelo.

• Vaixiello.
• Galera.
• Avión.