Elena Fernandez - Wikipedia, entziklopedia askea.

Wikipedia, Entziklopedia askea

Elena Fernandez
Bizitza
Jaiotza	Donostia, 1959ko abuztuaren 13a
Herrialdea	Gipuzkoa, Euskal Herria
Heriotza	Berriatua, 2014ko abenduaren 1a (55 urte)
Hezkuntza
Heziketa	Euskal Herriko Unibertsitatea
Hizkuntzak	euskara gaztelania
Jarduerak
Jarduerak	igeriketa

Elena Fernandez Iturrioz (Donostia, Gipuzkoa, 1959ko abuztuaren 13a - Berriatua, Bizkaia, 2014ko abenduaren 1a) igerilari eta igeriketako entrenatzaile eta monitorea izan zen. Kimikan lizentziatu bazen ere, igeriketako entrenatzaile titulua atera eta igeriketa izan zuen bizibide.^[1]

Elena Fernandez Iturrioz Donostian jaio zen, Plaza Berrian (edo Konstituzio Plazan). 11 urterekin hasi zen igerian, medikuak aginduta, hankan herrena zuelako. Laster nabarmendu zen emakumeen haur-kategorian, eta lehen postuak lortu eta errekorrak hautsi zituen aurreragoko kategorietan ere (baita beteranoetan ere); esate baterako, 1976. urtean, Gipuzkoako jubeniletan 19 errekor egin zituen, eta 1977an, 10 errekor. Donostiako Real Club Nauticon eta Fortuna Kirol Elkartean eta Ondarroako Ondarru Igeri Taldean ibili zen. Irmo eta kiroltasunez entrenatuta, ibilbide distiratsua osatu zuen.

Kimika lizentziatura atera zuen Donostiako EHUn, Petrokimika espezialitatean, Makromolekulak aukeran; baita Certificado de Aptitud Pedagógica (CAP) titulua ere, Bigarren Hezkuntzako irakasle izateko derrigorrezkoa zena. Igeriketarekin lotutako hainbat titulu ere lortu zituen 1980-1986 urteen artean: monitore, entrenadore laguntzaile eta goi-mailako entrenatzaile tituluak, Espainiako Igeriketa Federazioaren izenean, Entrenatzaileen Eskola Nazionalak (Escuela Nacional de Entrenadores) emanda. 1992an eta 1993an eskola horrek antolatutako igeriketa espezializatuko mintegietan parte hartu zuen: igeriketa eta haurtxoak, igeriketa haurdunaldian eta igeriketa eta mantentze fisikoari buruzko mintegietan. Sorosle titulu bat baino gehiago ere bazuen: lehen sorospenetakoa eta uretakoa.

1984an Ondarroako Zaldupe udal kiroldegira joan zen lanera, urtebeterako. Igeriketa monitore aritzeko hartu bazuten ere, hurrengo urtera arte ez zen hasi lanean, kiroldegia artean bukatu gabe zegoelako. Ondoren, lanpostu finkoa lortu zuen Ondarroan, eta 1986an Ondarru Igeri Eskola sortu zuen; urte horretan bertan antolatu zuen Ondarroako lehen igeri itsas-lasterketa. 1987an, juridikoki eratu zen Ondarru Igeri Taldea (Espainiako federazioak hainbat eragozpen jarri zituen arren, bere estatutuak euskaraz egin zituen Euskal Herriko lehenengo taldea izan zen, Andres Urrutia Badiola notarioaren eskutik).^[1][2][3]

Elenak Ondarroan ikasi zuen euskaraz eta Ondarroan osatu familia: senarra Josu Arrizabalaga Badiola ondarrutarra izan zuen, eta bi seme-alaba izan zituzten, Ainhoa eta Kepa. Aitona zuen Elenak jaiotzez ondarrutarra.

Lanean jardun zuen urteetan (1985etik 2002ra), makina bat ume ondarrutarri erakutsi zion igerian; gainera, igerilari horietako batzuek emaitza bikainak lortu zituzten: bik parte hartu zuten Europako txapelketan, eta lau ibili ziren Espainiako errendimendu handiko zentroetan.

2002. urtean, ordea, Alboko Esklerosi Amiotrofikoa (AEA) diagnostikatu zioten, eta lana utzi egin behar izan zuen. 2002ko uztailean, ohiko lanbiderako erabateko ezintasun iraunkorra aitortu zion Bizkaiko Gizarte Segurantzako Institutu Nazionalak; pentsioaren %55  kobratuko zuen. Elenak erreklamazioa jarri zuen ebazpenaren aurka, baina gaitzetsi egin zioten. Orduan, demanda aurkeztu zuen epaitegian. Epaiketa bere aldekoa izan zen, eta pentsioaren %100 lortu zuen. Gizarte Segurantzak, berriz, errekurtsoa jarri zuen. 2003ko martxoan irabazi zuen Elenak errekurtsoa.

2010ean, Berriatuan bizitzen jarri zen, erosotasunagatik.

Ondarroako udalak 2011. urteko kirol sarietan Elena Fernandezi egin zion aipamen berezia igeri taldea sortu eta igeriketari herrian emandako bultzadagatik.^[4][5]

2014ko abenduaren 1ean hil zen AEA gaixotasunaren ondorioz. Ondarrutarrek merezitako agur-omenaldi xume baina jendetsua egin zioten abenduaren 2an Zaldupe kiroldegian: Loren Arkotxa Meabebasterretxeak gidatuta, Elena Fernandez Iturriozen bizitzako pasarteak gogoratu zituzten honen lankideek, familiakoek, lagunek eta igerilariek, eta euren sentimentuak eta esker ona adierazi ere bai, Elenaren gustuko musika entzunez (Benito Lertxundiren Oi Ama Eskual Herri, danborradako Sarriegiren San Sebastian martxa, Xabier Leteren Xalbadorren heriotzean, Polo Montañez kubatarraren Canten), eta Jose Mari Lejardi Kareaga Gabixola bertsozale eta gaijartzaile markina-xemeindarrak eta Leire Larrañaga Arrizabalaga ilobak bertsoak abestu zizkioten; honek Aiert Ordoñez Adarraga donostiarrak, Elenaren lagun handi baten semeak, jarritako bertsoak kantatu zizkion.^[6] Hileta ospakizunetan loretan gastatuko zen dirua ADELA EUSKAL HERRIA elkarteari (Euskal Herriko alboko esklerosi amiotrofikoaren elkarteen federazioari) eman zekion izan zen bere borondatea, eta garuna eta bizkarrezur-muina, berriz, zientziak aztertzeko dohaintzan eman zituen.^[7]

Jose Mari Lejardi Kareaga Gabixolarenak:

Aiert Ordoñez Adarragarenak, Leire Larrañaga Arrizabalagak abestutakoak:

Urtea	Txapelketa	Lekua	Proba
1972	IV. Munich Saria	Donostian, Teniseko igerilekuan	Haur emakumezkoak -100 m tximeleta eran: 2. postua -400 m librean: 1. postua
1973	Eskolarteko nesken txapelketak	Donostian, Kontxako igerileku estalian	Haur emakumezkoak -100 m tximeleta eran: 1. postua -100 m librean: 1. postua
1973	Gipuzkoako neguko txapelketa	Bergarako Agorrosin igerileku estalian	-100 m librean: 1. postua -400 m estilo: 2. postua
1973	Gipuzkoako Txapelketa Nagusiak	Tolosako Igarondo igerileku olinpikoan	-100 m librean: 1. postua -200 m estilo: 4. postua
1973	Getaria-Zarautz itsas-zeharkaldia	itsasoan	-Emakumezkoen Absolutoa: 1. postua (1)
1973	Badiako zeharkaldia / XXXI. Kontxa Badiako Igerialdia	itsasoan	-Emakumezkoen Absolutoa: 1. postua
1973	Sobietar Igeriketa Txapelketak	Rostov-on-Don hirian, igerilekuan	Emakumezko haurrak: -800 m librean: 1. postua
1973	VII. Santo Tomás Saria	Kontxako igerileku estalian	Haurrak: -100 m crowl+lepoz+bularrez + tximeleta eran: 1.postua
1974	VI. Gipuzkoako Txapelketa Nagusiak	Ordiziako Altamira igerileku estalian	Emakumezkoak: -400 m estilo: 2. postua -100 m librean: 1. postua -100 m tximeleta eran: 2. postua
1974	XVII. Bilboko euskal eta nafar txapelketak	Club Deportivo Bilbaoko igerilekuan	Emakumezkoetan: -200 m tximeleta eran: 4. postua -100 m tximeleta eran: 4. postua -4 x 100 estilo, errekorra
1974	Haur eta gazteentzako Vasco-Navarro Saria	Bergarako Agorrosin igerileku estalian	Emakumezkoetan: -200 m librean: 1. postua eta Gipuzkoako gazteen errekor absolutoa
1974	IV. San Juan Saria	Tolosako Igarondo igerilekuan	Emakumeetan: -100 m tximeleta eran: 2. postua eta Gipuzkoako errekorra haurretan
1974	XXX. Euskal Herriko txapelketa absolutuak	Bilboko Jolaseta igerilekuan	-200 m librean: 2. postua eta Gipuzkoako errekorra -800 m librean: 2. postua eta Gipuzkoako errekorra
1974	Espainiako igeriketa txapelketak	Valentzian, igerilekuan	-100 m tximeleta eran: gutxieneko denbora lortu zuen.
1974	Montreal Saria		-200 m librean: 1. postua eta Gipuzkoako errekor absolutoa
1974	Badiako zeharkaldia/ XXXII. Kontxa Badiako Igerialdia	itsasoan	-Absoluto femenino: 1. postua
1974	X. Uharteko zeharkaldia	Donostian, itsasoan	-Absoluto femenino: 1. postua
1974	VIII. Santo Tomas Saria	Kontxako igerileku estalian	Neska kadeteetan 1. postua
1975	Nesken Eskolarteko Txapelketa	Kontxako igerileku estalian	Kadeteetan: -100 m tximeleta eran: 1. postua -400 m librean: 1. postua
1975	XI. Uharteko zeharkaldia	Donostian, itsasoan	-Absoluto femenino: 1. postua
1976	Neguko Gazte Txapelketak	Kontxako igerilekuan	-400 m librean: 1. postua eta Gipuzkoako errekor absolutoa
1976	Gipuzkoako Txapelketa Nagusiak	Bidebietako igerileku estalian	-800 m librean : 1. postua eta errekorra -400 m estilo: 1. postua eta errekorra -400 m librean: 1. postua eta gazteen errekor absolutoa -200 m librean: 1. postua eta errekorra -200 m tximeleta eran. 2. postua -100 m librean: 1. postua
1976	Haur eta gazteentzako Vasco-Navarro Saria	Bilboko Landatxueta igerilekuan	-400 m librean: Gipuzkoako gazteen errekor absolutoa
Bergarako Agorrosin igerileku estalian	-200 m librean Gipuzkoako gazteen errekor absolutoa
Gasteizko Mendizorrotza igerileku estalian	-200 m tximeleta eran: 1. postua eta Gipuzkoako errekorra -800 m librean: 1. postua
1976	VI. San Juan Saria	Tolosako Igarondo igerilekuan	-100 m tximeleta eran: 1. postua -100 m librean: 1. postua -4 x 100 estilo: 1. postua
1976	XII. Uharteko zeharkaldia	Donostian, itsasoan	-Absoluto femenino: 1. postua
1977	Gipuzkoako Txapelketa Nagusiak	Bidebietako igerileku estalian	-400 m librean: 1. postua -100 m librean: 1. postua
1977	Gipuzkoa Gaztea Saria	Ordiziako Altamira igerileku estalian	-100 m librean juveniles: 1. postua -100 m braza juveniles: 1. postua
1977	Unibertsitateko Txapelketa Nazionalak	Murtziako udal igerilekuan	-Urrezko hiru domina: 800 m tximeleta eran, 400 m librean eta 100m librean. Espainiako Unibertsitateetako txapelduna -100 m librean: Gipuzkoako gazteen errekor absolutoa
1978	Unibertsitateko Txapelketa Nazionalak	Madrileko La Almudena igerilekuan	-400 m librean: 2. postua (zilarrezko domina) -100 m tximeleta eran: 3. postua -100 m librean: 5. postua
1979	Euskadiko Txapelketa Nagusiak	Gasteizen	-100 m librean: errekorra
1979	Unibertsitateko Txapelketa Nazionalak	Madrileko La Almudena igerilekuan	-Zilarrezko hiru domina: 100 m librean , 400 m librean eta 100 m tximeleta eran
1980	Gipuzkoa Neguko Saria	Ordizian	-200 m librean: 1. postua eta Gipuzkoako errekor absolutoa
1980	Unibertsitateko Txapelketa Nazionalak	Granadan	-Urrezko domina bat: 100 m librean -Zilarrezko bi domina: 400 m librean eta 100 m lepoz
1988	XIII. Javier Seminario Memoriala (beteranoen Gipuzkoako Txapelketa)	Donostian, Teniseko igerilekuan	-50 m tximeleta eran(A): 1. postua -50 m librean (A): 1. postua -Puntuazioa guztira: 1. postua
1999	I. Igeri zeharbidea, Plentziako Zubiak	Plentziako uretan	Txapelduna emakumezko mastersetan

• 1975 urteko Gipuzkoako emekume jubenil kategoriako igerilari gailenenari saria.
• Gipuzkoako Igeriketa Federazioak urteko igerilaririk onena izendatu zuen 1976an, 1977an eta 1978an.
• Gipuzkoako kirolaririk onena 1978an.
• 1977an, Campeona de España Unibersitaria.
• 1992an, Ondarroako kirol talderik onena: Ondarru Igeri Taldea.
• 2011n, Ondarroako urteko kirol sarietan aipamen berezia Elena Fernandez Iturriozi.
  

Elena Fernandez Iturrioz 2014ko abenduan hil eta hurrengo Ondarroako Igeri Itsas-lasterketan (2015eko XXX. edizioan) momentu hunkigarri ugari bizi izan ziren Ondarroako Arrigorri hondartzan. Bozgorailuetatik une oro gogoratu zuten igeri taldearen sortzailea eta bultzatzailea. Hainbat urtez bere ikasle izan zirenak, esate baterako, batera helmugaratu ziren, eta kiroldegiko bere lankideek ere parte hartu zuten proban. Sariak banatzen, Josu senarra eta Ainhoa eta Kepa seme-alabak aritu ziren, eta, bukaeran, senideek merezitako omenaldi xumea jaso zuten erabat hunkituta eta txalo artean.^[1][8]

Urte horretatik hasita, Ondarroako Igeri lasterketari Elena Fernandez Iturrioz Memoriala deitu zitzaion, eta Ondarru Igeri Taldeko igerilari diren eta izandakoen artean banatzen da Elena Fernandez Iturrioz saria.^[9]

• 

  1973, eskolarteko nesken txapelketak

• 

  1973, Badiako zeharkaldia

• 

  1974, Badiako zeharkaldia

• 

  1975, Uharteko zeharkaldia

• 

  1976, errekorra Gasteizen

• 

  1977, errekorra eta urrezko dominak

• 

  1978, zilarrezko domina

• 

  1979, zilarrezko hiru domina

• 

  1980, urrea eta zilarra

• 

  1988, Seminario Memoriala