تابستونی المپیک - ویکی‌پدیا

ویکی‌پدیا، آزادِ دانشنومه، جه

المپیکِ تابستونی کائون (به فرانسوی: Jeux olympiques d'été) اتا ورزشی تورنمنت هسته که هر چار سال ات‌بار برگزار وونه. اولین کَش، سال ۱۸۹۶ آتن، یونان دله این مسابقات ره برگزار هاکردنه و آخرین بازی‌ها سال ۲۰۲۱ توکیو، جاپون دله برگزار بیّه. المپیک بین‌المللی کمیته (IOC) اینتا مسابقاتِ مسئول هسته که سازماندهی و نظارت ونه گردن دره. سال ۱۹۰۴ تاسا کسایی که المپیک دله مقوم یارنه ره مدال دِنّه. نفر اول طلا، دوم نقره و سوم برنز مدال گیرنه. المپیک اتی چله هم دارنه که زمستونی المپیک نوم دارنه و تابستونی المپیکِ دستوری بساته بیّه.

المپیکِ مسابقات مدام گت‌تر وونه؛ اولین دوره فقط ۲۵۰ نفر مَرد، که چارده‌تا کشور جه بمو بینه، المپیک دله شرکت هکردنه ولی اسا بیش از یازده هزار نفر، که نصف-به-نصف زنان هم درنه، مسابقه دنّه و تقریباً تموم کشورون جه این تورنمنت دله درنه. المپیک تا اسا نوزده‌تا کشور دله برگزار بیّه که پنج‌تا قاره دله دَینه. آمریکای متحده ایالات پنج کش (۱۹۰۴، ۱۹۳۲، ۱۹۸۴، و ۱۹۹۶)، بریتانیا سه دفعه (۱۹۰۸، ۱۹۴۸، و ۲۰۱۲)، یونان دِ بار (۱۸۹۶ و ۲۰۰۴)، فرانسه سه کَش (۱۹۰۰، ۱۹۲۴ و ۲۰۲۴)، آلمان دِ بار (۱۹۳۶ و ۱۹۷۲)، استرالیا دِ دفعه (۱۹۵۶ و ۲۰۰۰) و جاپون هم دِ بار (۱۹۶۴ و ۲۰۲۰) میزبان بَینه و کشورون دیگه هرکمین ات صوه میزبانی هکردنه: سوئد (۱۹۱۲)، بلجیک (۱۹۲۰)، هلند (۱۹۲۸)، فلاند (۱۹۵۲)، ایتالیا (۱۹۶۰)، مکزیک (۱۹۶۸)، کاندا (۱۹۷۶)، شوروی (۱۹۸۰)، جنوبی کره (۱۹۸۸)، ایسپانیا (۱۹۹۲)، چین (۲۰۰۸) و برزیل (۲۰۱۶)

فقط پنج‌تا کشور درنه که تموم المپیک‌های دله شرکت داشتنه: استرالیا، فرانسه، بریتانیا، یونان و سوییس. استرالیا و فرانسه و بریتانیا هر دوره اقلاً اتا مدال ره بَیتنه و تنها کشوری که تموم دوره‌ها طلا داشته، بریتانیا هسته. آمریکایِ متحده ایالات بیشترین مدال و بیشترین طلا ره داشته و ویشترین دوره اول بیّه. آمریکایِ په شوروی، بریتانیا و چین درنه.

• ویکی‌پدیای کارزنون، «Summer Olympic Games»، انگلیسی ویکی‌پدیا، آزاد دانشنومه، دله. (هارشی‌یه بَیی ۲ آوریل ۲۰۲۳).