heroyspelet.no

Herøyspelet | KONGENS RING

Historisk utespel der 200 aktørar skaper spelmagi på den store naturscena mot Stadhavet.

Laurdag og søndag 5.- 6. juli 2025.

Velkomne skal de vere!

AKTIVITETAR

PRAKTISK

Du kan også kjøpe billett på Herøy gard før forestillingane. Betaling med Vipps, kort eller kontantar.

Prisar

inkludert båt- eller buss:

Barn under 7 år: Gratis
Barn 7-16 år: 200 kr
Vaksne: 430 kr

Vil du sjå spelet fleire gongar same helga? Kjøp Herøyspel-pass.
Barn: 400 kr. Vaksne: 600 kr.

Grupper på ti personar eller fleire kan ta kontakt med
styreleiar Linn Therese Sævik på tlf 979 83 305

Spelet “Kongens Ring” vert vist på den vesle øya Herøy midt i Herøy kommune, på same øya som Herøy kystmuseum ligg. Under spelhelga kan du ikkje køyre bil heilt fram, så vi inviterer deg med på båt- eller busstur fram til øya. Transport og parkering er inkludert i bilettprisen.

Bussane går kontinuerleg heile dagen frå området ved Stokksund skule (Grøndalsvegen 2) og Indre Herøy kyrkje. Det er godt synleg når du kjem køyrande langs fylkesveg 654 frå Tjørvåg. Der er godt med parkeringsplass og parkeringsvakter som hjelper deg både med parkering og informasjon om bussane.

Båten går kontinuerleg heile dagen frå Mjølstadneset. Også her er det godt skilta og godt med parkeringsplass. Vakter er på plass og gir ei hand om bord i båten. Der er landgang og flytebrygge med trapp.

Spelplassen og amfiet ligg med storslagen utsikt til Stadhavet. Du kan oppleve spelet i den varmaste og finaste sommardag der alt du treng er solkrem, solbriller og godt, kaldt vatn. Men like ofte kan det blåse kaldt eller sørvesten kan kome med regntunge skyer frå storhavet.

Bakteppet vekslar med veret og Vårherre er lysmeister. Det gjer at spelet skiftar frå år til år og frå forestilling til forestilling. Men det gjer også at publikum må kle seg etter forholda. Varme og regntette klede kan kome godt med. Og ein liten, lett regnponcho som ditt private “telt” er praktisk og nyttig i amfiet. Under forestillingane er det ikkje lov med paraply.

Herøyspelet er meir enn spel. Utvid oppleving med god mat og god prat i tunet på Herøy gard. Der får kjøpt både middagsmat og kaffimat i samband med spelet. Vi byr på rømmegraut og fiskekakeburger, pølser og mår med brød. I tillegg sel vi vaflar, sveler og is, kaffi, brus og vatn.

Det er brei og asfaltert sti fram til spelplassen som kan brukast både av folk med rullestol og dei som trillar barnevogn. Ved spelplassen er det oppstillingsplass for rullestolar. Det kan også avtalast skyss med bil fram til spelplassen for dei som er skrale til beins. Det er teleslynge i delar av amfiet. Amfiet er i ei graskledd skråning med halve tømmerstokkar som benkar. Desse har ikkje ryggstø. Har du vanskeleg for å fote deg, kan du få gå på flatt underlag fram til dei nedste benkane.

Det er fleire toalett ved Herøy gard og eit enkelt festival-toalett ved spelplassen.

SISTE NYTT

Kongens ring i sosiale media

Kamp, kjærleik og kongemakt

Den unge hovdingdottera Unn er lovd vekk til Ingolf. Familien og herøyfolket meiner det er beste mannen for Unn, men Unn vil ha Møre-Karl, opprøraren og rebellen som herjar saman med flokken sin.

Unn rømer saman med Møre-Kar før ho kjem tilbake til heimplassen på røvartokt. Her barkar Møre-Karl og Ingolf saman i kamp, i holmgang.

Olav den Heilage
Då kjem kongen, Olav den Heilage, med sine menn. Han har jakta på Møre-Karl lenge, og kan kongen no endeleg få sett ein stoppar for herjingane frå Møre-Karl samtidig som han kan få herøyfolket til å tru på Kristus? Kongen spelar høgt og vil løyse desse to problema ved hjelp av eit tredje; innkrevjing av skatt på Færøyane. No kjem trollkvinna og mannen hennar inn handlinga. Dei har med seg ein gullring, kongens ring.

skMøre-Karl reiser til Færøyane. Kva skjer med han der? Kva skjer med Unn og herøyfolket? Og har heilag-kongen tru og kraft til å ta ringen frå trollkvinna?

Spelet spør om “Kva er den sterke makt i verda?” og svarer med håpet og oppmodinga om at “dei hjarto milde” skal sigre.

Spel sidan 1992
Herøyspelet “Kongens Ring” har vore framført kvart år sidan 1992. Manus er skrive av Rolf Losnegård som har spunne historia rundt Snorre si forteljing om då Olav den Heilage kom til Herøy i 1027. Musikken er komponert av Svein Møller medan Henning Sommerro har skrive songen til Inga og Øyvind Granden Berg har skrive Ingolf sin song.